Alma Kwok Instagram – –
我諗唔知由幾時開始，聖誕節唔再係一個聖誕節。再無聖誕聯歡會，唔會收到隔籬位寫俾你嘅聖誕咭，冇啲乜嘢抽獎唔會有失望，經過見到燈飾，喺呢個沉迷電話嘅世界裏邊，有幾多人真係會認真望多兩眼？一啲睇上去簡單幼稚嘅燈飾，令我少少觸動，或者咁講佢越簡單幼稚我越會觸動。
有人話聖誕節係耶穌生日，亦都有啲人話唔係，其實係同唔係都唔緊要，因為我相信而家聖誕節同過去起初嘅聖誕節喺意義上應該都相差得非常之遠。
天氣好凍，聖誕節，呢幾晚我都坐喺枱頭將4.48 psychosis 呢一個劇本再次輸入喺電腦，直到4.48，直到過埋4.48。幾年前我都做過呢一件事，呢件事好孤獨，佢必須要孤獨。喺呢個講求成績同結果嘅世界只會在乎賣幾多飛，再點樣壓榨成本，其他人嘅目光，評論評審評價，CV可以點樣再好睇啲。我好憤世嫉俗，我討厭嘅正正係現世推崇緊嘅嘢。
就算只係得一個觀眾，我都會全心全意將所有帶俾佢，建立劇本同觀眾之間嘅橋。因為我愛呢一位劇作家，即使佢冇寫呢一個劇本，我仍然愛佢。或者咁講，我寧願佢冇寫。呢個從來都唔係一個講關於「黐線」嘅劇本，可惜好多人都會將佢解讀為黐線精神病，成件事係好諷刺。
我將嗰一堆混亂嘅數字輸入喺電腦裏面，就係大約30年前，同一個人佢同我輸入緊一模一樣嘅數字，但係佢已經唔存在，佢留低俾我嘅就只有呢一堆文字。
我知道就算我變咗做一個流浪街頭連自己個名係乜嘢都唔記得嘅婆婆，我都仍然會記得佢。
我嘅內心承受緊一種好巨大嘅壓力，可能因為我真係好鍾意，可能因為我真係好耐冇真真正正做我覺得我想做嘅事。所以我害怕自己做得唔好。害怕即使丹心一片到頭來所有人只喜歡陳腔濫調追求形式，或者丹心一片其實只係自我沉溺都係冇用呢？點樣可以唔留於自我滿足，點樣保持自覺性，又點樣唔將自己扼殺。真係好難。
有人喜歡有人討厭，有人話唔係咁有人話應該要點，呢啲嘢已經係最微不足道嘅阻礙，本身要做好呢件事已經好難，我只係專心一致做返呢件事嘅本質就夠。就好似做人咁，做返自己就得。
對唔住 ，文字同埋圖片真係非常之唔相關，喺最後好想同大家講一句聖誕節快樂。 | Posted on 24/Dec/2023 21:41:00
