Aswathy Sreekanth Instagram – ഒരു മാസം കൊണ്ടെഴുതിയ ഒൻപത് കഥകൾ. അതാണീ പുസ്തകം. ഡി സി ബുക്‌സാണ് പ്രസാധകർ. ആദ്യത്തെ പുസ്തകം എഴുതി പൂർത്തിയാക്കിയിട്ട് പേന ഒരിടത്ത് വച്ചതാണ്. പിന്നെ തൊട്ടിട്ടില്ല. അടുത്തത് എപ്പോഴാണെന്ന് ഒരുപാട് പേർ ചോദിച്ചു. ഉടനെയെന്ന് ഞാൻ വെറുംവാക്ക് പറഞ്ഞു. പിന്നെ മുൻപെന്നോ എഴുതിവച്ച കവിതകൾ ചേർത്തൊരു പുസ്തകമാക്കി. എന്നിട്ടും പുതിയതായി ഒരു വരി പോലും ഉണ്ടായില്ല. സംഭവം എന്താന്ന് വച്ചാൽ, എഴുതണമെന്ന് കരുതും, മടി കൊണ്ടും മറ്റു തിരക്കുകൾ കൊണ്ടും പിന്നെയാവാം എന്ന് വിചാരിക്കും. ഇടയ്ക്കൊക്കെ ഞാൻ എന്നെത്തന്നെ വഴക്ക് പറഞ്ഞ് എഴുത്തിനിരുത്തും. മൊബൈലിന്റെ നോട്ട് പാഡിൽ രണ്ടോ മൂന്നോ വരി കുറിച്ചിട്ട് ഞാൻ താൽക്കാലികമായി കുറ്റബോധത്തിൽ നിന്ന് രക്ഷപെടും. സ്വന്തം സന്തോഷത്തിന് വേണ്ടി മാത്രം വല്ലപ്പോഴും കവിതകൾ എഴുതിയത് മാത്രമാണ് ആ കാലത്തെ ആകെ ആശ്വാസം. ഇടയ്ക്കൊക്കെ പഴയ പുസ്തകം എടുത്തുനോക്കും, ഇത് ഞാനെഴുതിയതോയെന്ന് ശങ്കിക്കും. ഇനിയൊരിക്കലും ഇങ്ങനൊന്ന് എഴുതാൻ എനിക്ക് കഴിയില്ലെന്ന് സങ്കടപ്പെടും. എഴുത്തെന്നെ അത്രത്തോളം വിട്ടു പോയിരുന്നു. ഡി സി ബുക്സിലെ ദീപ്തിയോട് ഒരു മാസത്തിൽ ഈ പുസ്തകം പൂർത്തിയാക്കി നൽകാം എന്ന് വാക്ക് കൊടുക്കുമ്പോൾ എന്റെ കൈയിൽ പൂർത്തിയാക്കിയ ഒരൊറ്റ കഥപോലുമില്ലായിരുന്നു. മൊബൈലിൽ പലപ്പോഴായി കുറിച്ചിട്ട ഒറ്റ വരികളുമായി ഞാൻ എഴുത്തിനിരുന്നു. ചില കഥകളുടെ തുടക്കം, ചിലരുടെ പേരുകൾ, ചില കഥകളുടെ അവസാനം…വേറെ യാതൊന്നുമില്ല. അങ്ങനെയൊരു ദിവസം എവിടുന്നോ ഒരുറവ പൊട്ടി അകം പുറം നനച്ച് ഒഴുകിത്തുടങ്ങി. ഷൂട്ടിംഗ് ലൊക്കേഷനിലെ ഇടവേളകളിൽ, കുഞ്ഞുങ്ങൾ ഉറങ്ങിക്കഴിഞ്ഞുള്ള രാത്രി നേരങ്ങളിൽ, യാത്രകളിൽ ഒക്കെയും എഴുതിക്കൊണ്ടേയിരുന്നു. കഥകൾ ഒന്നിന് പുറകെ ഒന്നായി ഇനി ഞാൻ എന്ന മട്ടിൽ നിരന്നു നിന്നു. എനിക്കറിയുന്നതോ ഞാൻ കടന്നു പോയതോ ആയ പല സ്ത്രീ ജീവിതങ്ങളും ഇതിൽ വന്നു പോയിട്ടുണ്ട്. അതുകൊണ്ട് തന്നെ അവരെ നിങ്ങൾക്കും പരിചയമുണ്ടാവും, മറ്റൊരിടത്ത്, മറ്റൊരു പേരിൽ, മറ്റൊരു രൂപത്തിൽ അവരെ നിങ്ങൾ കണ്ടിട്ടുണ്ടാവാം. അല്ലെങ്കിൽ അവർ നിങ്ങൾ തന്നെ ആയിരിക്കാം. യാതൊരു അവകാശ വാദവുമില്ല. മറ്റെന്തിനേക്കാളും എന്നെ ഞാൻ ആക്കി നിർത്തുന്നത് എഴുത്താണെന്ന തിരിച്ചറിവിന് വീണ്ടും അടിവരയിട്ടു കൊണ്ട് ഇത് നിങ്ങൾക്ക് തരുന്നു. കോഴിക്കോട് നടക്കുന്ന കേരളാ ലിറ്ററേച്ചർ ഫെസ്റ്റ് വേദിയിൽ വച്ച് ജനുവരി പതിമൂന്നിനാണ് പ്രകാശനം @dcbooks സ്നേഹപൂർവ്വം അശ്വതി