Vincent Kok Instagram – 過往曾經拍過幾齣戲，裡面有幾場動作場面。在拍攝現場睇見龍虎武師手足們硬食拳腳，從高處撻生魚落地，心諗拍戲啫，人哋搵食啫，憑咩搞到人受傷周身痛，覺得非常唔好意思，成日問有冇事有冇事？動作指導同我講，我呢類導演唔夠硬，唔適合拍動作片。
鄭保瑞系出名門夠晒硬，過往拍嘅動作片金漆招牌，唔理你係大明星或演員，埋得位就嚟真咁打，唔痛唔收貨。今次《九龍城寨》更加提升到一個新境界，完全唔解釋點解咁好打，總之打，打到七彩。打與打百忙之間又抽到空講吓男兒義氣傲氣，地獄也獨來獨往返。
動作指導谷垣健治可以造定西裝等提名金像獎，不過最緊要其實係佢班底嘅龍虎武師夠Fit夠摶夠膽正命平。演員們有幾辛苦，武師手足們起碼辛苦十倍。同期咁橋有齣幾好睇嘅西片《The Fall Guy》，導演特別將此片向動作演員致敬，謹此順便向此片借幾分敬意，獻給《九龍城寨》的武師手足們，也向瑞導及動作指導致敬，能夠率領一班身家億億聲嘅大明星、年青冇乜動作經驗但肯摶嘅新晉、與及心口有個勇字嘅武師手足們，上下一心，眾志成城，一齊一心為阿公做嘢，拍好部戲，呢份領導能力可謂非凡，程度同帶軍打一場戰爭冇乜分別，佩服！
#九龍城寨
#TheFallGuy
#特技狂人
#向武師手足致敬
#唔好意思九龍城寨張相矇咗啲 | Posted on 05/May/2024 08:00:42
