Vincent Kok Instagram – 落了幾個禮拜雨，有咩好得過喺屋企煲劇、叫外賣……
圖1 《淚之女王》
吹漲，明知又係有絕症、愛妳愛你愛到發晒狂、奸人擠眉弄眼、壞人壞到上心口嘅「巷」嘢，但係女主角對眼鬼咁識做戲，「妹」起個嘴有幾分少女味，仲要零死角靚到哩… 點到你唔服？男主角面口其實有幾分似「小瀋陽」，不過身型確係一流，又叻7/24含情脈脈帶點淚光咁望實人，又係唔到你唔服。最服係Production，貫徹始終靚人靚衫靚地方，仲要經常好天氣，成日都有Magic Hour 大 Wide Shot，須知 Magic Hour 每日得一陣，要用心機、時間苦心經營肯等先有咁嘅效果，我服！
圖2《三體》
好睇，鐘意就鐘意，唔鐘意就唔鐘意，冇得勉強。係有多少同《天地雄心》相似，但係《三體》嘅想像力充沛百倍，科學材料又夠大石責死蟹，趣味盎然。尤其Proud Of 曾國祥導演，頭兩集電影感最強，將一個複雜故事講得有條不紊、清清楚楚、引人入勝。《三體》肯定了曾導成為荷里活級導演地位，可喜可賀。
圖3《Ripley》
黑白拍攝，頭集半要捱，直至到了歐洲就明白點解要黑白拍攝，也同意了應該要黑白拍攝。畫面構圖美得令人心折，一邊睇一邊想上網訂機票去歐洲行吓。故事改編自一本書，廿幾年前拍過一套戲，Matt Damon主演，都好好睇。黑白版《Ripley》劇集由奧斯卡得獎編劇執導演筒，文人揸Fit，劇情推進淡淡定定、斯斯文文殺人唔眨眼，你急導演唔同你急。煲呢套劇要有多少耐性、格調。
圖4《同情者》
新鮮熱辣出爐，改編自普利玆小說獎獲獎小說，故事設定在越戰後，主角又係內奸又係美國移民…… 其實個劇講乜完全冇所謂，最重要嘅係頭三集嘅導演係小弟嘅偶像朴贊郁導演，主演之一有Robert Downey Jr.，夠晒理由即刻睇，冇得等，講完！
#落雨煲劇
#淚之女王
#三體
#Ripley
#同情者
#朴贊郁 | Posted on 04/May/2024 20:15:10
