Hanan Turk Instagram – كل مرة الواحد يتأمل في دعاء الاستخارة يلاقي معانيه أروع ما يكونو يزداد تمسكه بالدعاء ده في أدق الأمور ، يعني في 3 جمل في دعاء الاستخارة جمالهم غير عادي :
–اللهُمَّ إنْ كُنْتَ تَعْلَمُ أن هذَا الأمرَ خَيرٌ لي في دِيني ومَعَاشي وعَاقِبَةِ أمْري أو قالَ: عَاجِلهِ وآجِلِهِ .
1 / جملة (( عاقبة أمري عاجله و آجله )) :
يعني أنت ممكن تفرح سنتين بالوظيفة بس تندم بعد السنتين دول أوي
أنت ممكن تفرح بالجواز دي شوية و بعدين تعاني فيها
أنت بتدعي ربنا إن الموضوع ده لو دلوقت خير وبعدين خير فقدره ليا، لإن في بعض الأمور بتبقى حاليًا شكلها خير جدًا، بس بعد كده الوضع بيتقلب، و ده يخليك تحمد ربنا على كل أمر متمش حتى لو فعلًا كان خير جدًا، انت متعرفش كمان فترة الخير هيزداد خيرية و لا شر !
– وإنْ كُنْتَ تَعْلَمُ أنَّ هذا الأمْرَ شَرٌّ لي في دِينِي ومَعَاشي وعَاقِبَةِ أمري – أوْ قالَ: عَاجِلِهِ وآجِلِهِ – فَاصْرِفْهُ عَنِّي، وَاصْرِفْنِي عَنْهُ .
2/ جملة (( فاصرفه عني و اصرفني عنه )) :
يعني الجوازة تروح بس مقعدش مقهور عليها سنين، يعني الشغلانة تروح و افضل محسور جوايا كتير عليها، يعني أنت بتطلب من ربك إن الموضوع ده لو شر يتقفل براك و (( يتقفل جواك )) لان حتى دي إحنا أضعف من إننا نتحكم فيها !
وا قْدُرْ لِيَ الـخَيْرَ حَيْثُ كَانَ، ثُمَّ أرْضِنِي بِهِ.
3/ جملة ( ارضني به ) :
يعني مش ضروري كل جوازة حلوة هي جوازة سعيدة، و لا كل شغلانة مرتبها كبير بتسعد، السعادة إنك ترضى و الحاجة في عينك تبقى ملياها و شايف الجمال اللي فيها فـ تحس بالاكتفاء ، فـ أنت بتطلب من ربك خير يسعدك، مش خير و خلاص، و ده قمة حُسن الظن في الكريم .
#مفاتيح_السكينة | Posted on 03/Mar/2023 02:58:40
