Jessica Chan Yee Chun Instagram – 〈分手〉已經係各大音樂平台上架 🎧
今次同Billy合作嘅契機係源於一個少少無厘頭嘅Threads（多謝神奇嘅演算法）。本身佢同我係完全唔熟，但好多謝佢願意花時間花心機同我一齊合作呢首歌。由零開始到製作完成，其實都用咗超過半年，過程中學咗超多嘢！每一次練完歌返屋企嗰程的士，我都係懷住一個超滿足嘅心情，呢度都要shout out to producer 一丁 @leeyatding 🫡
一開始我哋坐低去傾想寫一首咩歌嘅時候，我同Billy講一直好羨慕歌手可以將自己嘅情感透過歌詞抒發。討論嘅過程中，發現原來好多時（當然並非全部）男女之間對如何完結一段感情嘅取態同方法可以有如此大差異，所以就誕生咗呢首歌嘅雛型。多謝Billy聽咗我好多諗法，寫咗而家呢份詞出嚟。
而最尾段vo，唔知大家聽完有冇一啲感受。如果冇嘅話，都係好事嚟嘅。嗰句說話之所以擺落去，係取材自過去一段感情結束嘅時候，真係問過對方呢個問題。呢個問題可能好戇居，但有時人就係咁軟弱。段vo最後留咗個懸念，究竟有愛過定冇愛過，答案留俾觀眾自己從MV中感受。
MV入面嗰對曾經甜蜜嘅情侶，並唔係Billy同Jessica，佢哋可以係你哋任何一位。我哋只係藉住呢個作品，將正常情侶嘅熱戀期透過鏡頭呈現出嚟。畢竟我相信，一對情侶無論最後用咩方式結束關係，都總有過好似MV入面嘅美好時光。而分手嘅痛之所以令人窒息，亦都係因為呢啲只屬於彼此嘅回憶，無形中會侵襲你到體無完膚。而呢個MV，就係由一幕幕嘅回憶構成。
最後最後，辛苦圖導 @travisgoood 天寒地凍又要揸cam又要導戲，最後係緊拙嘅時間下剪咗一條咁型嘅MV出嚟。辛苦 @lamshirmi 凍到包到成隻糉咁都係側邊陪住我。
少咗你哋任何一個都唔會成事 🩶 | Posted on 20/Feb/2025 16:39:58
