Wahida Dridi Instagram – الفنانين قاعدين يودعوا فينا كل يوم …
شيء بالحياة و شيء بالهجرة ..
تقلي الموت قضاء الله نقلك لا مرد لحكم الله ..
تقلي الهجرة مكتوب نقلك الي تقولو مماتي الي مكتوب على الجبين ..
لكن عيشة الفنان .. عيشة ضنك يتعب و يعرق
و يتحصل على منح أقل ما يقال عنها تسد الواجبات اليومية لفترة …
يبدع و الا يشري الخبز و يلوج على كراء في أي تركينه قد مداخيله و يعاني المشاكل
و يتكب و يتقعد…
و فمه ساكت لانه لازم يحافظ على كرامته و هيبته
مش عيب ؟
لا مش عيب …
لانه العالم الكله ولى عالم عيوب حروب و جوع
و قلة اخلاق و ابعد ما يكون عن الإنسانية حروبات
و مجاعات و تقسيم للمصالح
و بهامة كبيرة في التعامل مع الحياة ..
الحيوان ارفع مستوى عمركم سمعته بحيوان عنده شذوذ جنسي ..
عمركم سمعته بحيوان يقتل وهو شبعان ..
عمركم سمعته بحيوان يحتل مرعى متاع حيوان اخر ..
عمركم سمعته بنمر قتل عصفور خاطر يغني ..
و الا قتل فيل خاطر مش من نفس العرق أو من نفس العقيدة
الحيوان تعزفله موسيقى يهدأ …
الحيوان تعلمه يعيش معاك خارج بيئته يتعلم و يتأقلم
الذيب عمره ما يخون شريكته ..
الذيب يتلهى بكبار
السن من القطيع و يوكلهم .. عمره ما خلاهم منسيين وجواعه …
عمركم سمعته بأسد خرّج ورقة و قال هذا صك الحياة ايا سيدي الي كبر من القطيع يدفن روحه بالحياة
و قالك الإنسان خليفة الله في الأرض …
اسقط عرق في وقتنا الحالي هو الانسان الا ما رحم ربي …
واصلوا انتهاك الأعراض و السبان و التقشتيل
و اصدار قرارات وقتاش لازم الناس تشد تركينه
و تستنى الموت ..
واصلوا الشذوذ و الخروج عن الطبيعة ..
واصلوا تبرير القتل و التجويع …
الملخص واصلوا الحيوانية الي الحيوان بيدو يتبرأ منها و منكم … | Posted on 14/Aug/2025 19:32:09
