Sherihan Instagram – أجدادنا لما بنوا الأهرامات، سابولنا الغاز كتير، لدرجة إن خيال كتير من العلماء وصلهم لنظرية عجيبة!!! .. بتقول إن نجوم أوريون في السما إتجمعت ورا بعضها، بنفس ترتيب الأهرامات …
المصري القديم رسم صورة السما، لأنه آمن إن الكون ميزان بكفتين، ليل ونهار، موت وحياة، إيزيس وأوزوريس أجمل وأعظم قصة حب في الوجود …
المصري القديم إكتشف ولاحظ نجوم أوريون رمز أوزوريس، جنبها بتدور نجمة سيريوس، رمز الحبيبة إيزيس، وإيزيس لما بتقابل أوزوريس في الفضا، بتحصل رقصة حب، والنيل بيفيض على أرضنا …
بنفس الروح اللي حاورت النجوم، وبنفس الإيد اللي خلقت الحضارة، بنينا المتحف المصري الكبير، إمتداد لحسابات المصري القديم، علي خط واحد مع خوفو وخفرع ومنقرع، سطحه يعكس نور الشمس، وضي النجوم …
مصرية أنا .. وأفتخر بإنتمائي، لأقدم شعب، وأول حضارة، وأول جيش نظامي علي وجه الارض، وأول دولة في العالم “لها” تاريخ مكتوب، ومحظوظ اللي أتولد في بلد، الفن فيها متأصل، ومنحوت علي الجدران، بيجري في عروقي وعروق كل مصري من آلاف السنين.
#GrandEgyptianMuseum #GEM #GrandOpening
#Sherihan | Posted on 04/Nov/2025 21:38:10
