Riham Abdel Ghafour Instagram – لما الجمهور بيحب
يقول عن ممثل أو فنان إنه وصل للبرايم بتاعه، بيقولوا عليه ده “استوى”، ولو اتكلمنا عن ريهام عبد الغفور هنقدر نقول إنها “استوت” من سنين كتير مش في 2022، واتحولت من دور البنت البريئة صاحبة الملامح الهادية، لممثلة قادرة تقدم أشكال وأنواع مختلفة وبتنقي أدوارها بميزان حساس.
لكن في نفس الوقت، نقدر نقول إن 2022 بالنسبالها كانت سنة تكليل لكل الجهود اللي عملتها في سنين فاتت عشان تقدم نفسها كنجمة متنوعة ومختلفة، وقدرت خلالها تفرجنا على شخصيات درامية حقيقية ومش شبه بعضها وكلها تنجح وتعلم مع الجمهور، سواء “ضحى” في “وش وضهر”، أو “جيهان” في “منعطف خطر”، وختمت السنة بمسلسل رعب ناجح، هو “الغرفة 207”.
وماكتفتش بكده لكن كمان بدأت سنة ٢٠٢٣ بمسلسل “أزمة منتصف العمر” اللي كلنا بنستنى حلقاته ومبهورين بتمثيلها واتعلقنا بشخصيتها بعد حلقات قليلة شفناها.
عشان قدمتلنا قصص حقيقية وقدرت تخلينا نصدقها ونتفاعل معاها في كل مرة، ريهام عبد الغفور هي أكيد واحدة من قايمة مؤثرين 2022.
شوفوا كل حواراتنا مع كل “مؤثرين 2022” من قناتنا على يوتيوب
#مؤثرين_في_٢٠٢٢ | Posted on 02/Feb/2023 13:22:27
