Shreya Bugde Instagram – अभिनेत्री श्रेया बुगडे यांचा आज वाढदिवस.
मराठी मनोरंजनविश्वात हसवणं ही जबाबदारी ज्यांनी सातत्याने आणि अत्यंत प्रामाणिकपणे पेलली, त्या कलाकारांमध्ये श्रेया बुगडे यांचं नाव आवर्जून घेतलं जातं. बालकलाकार म्हणून रंगभूमीवर पाऊल ठेवत अभिनयाचा प्रवास सुरू केलेल्या श्रेयाने नाटक, मालिका, विनोदी कार्यक्रम आणि वेब सिरीज अशा सर्व माध्यमांत आपली स्वतंत्र ओळख निर्माण केली.
विशेषतः ‘चला हवा येऊ द्या’ या कार्यक्रमातील एकमेव महिला कलाकार म्हणून त्यांनी वर्षानुवर्षे प्रेक्षकांच्या मनावर अधिराज्य गाजवलं. अचूक कॉमिक टायमिंग, हुबेहूब मिमिक्री, देहबोलीचं सूक्ष्म निरीक्षण आणि प्रत्येक भूमिकेत प्राण ओतण्याची क्षमता ही त्यांची खरी ताकद ठरली. उषा नाडकर्णी, मुक्ता बर्वे, काजोल, शुभांगी गोखले यांच्यासह अनेक दिग्गजांच्या नकला करत त्यांनी त्या त्या कलाकारांसह प्रेक्षकांची मने जिंकली.
‘तू तिथे मी’ मधील गंभीर भूमिका असो, ‘फू बाई फू’मधील विनोदी बाज असो किंवा ‘बायकोला हवं तरी काय?’सारख्या वेब सिरीजमधील भूमिका साकारताना श्रेया यांनी स्वतःला केवळ विनोदी अभिनेत्रीपुरतं मर्यादित ठेवलं नाही तर वैविध्यपूर्ण भूमिका करून स्वतःची वेगळी ओळख निर्माण केली.
हसवतानाच प्रेक्षकांशी थेट नातं जोडत, मेहनत आणि सातत्यावर विश्वास ठेवणाऱ्या श्रेया बुगडे आज मराठी मनोरंजनविश्वातील एक विश्वासार्ह नाव ठरल्या आहेत.
आज त्यांच्या वाढदिवसानिमित्त, प्रेक्षकांच्या आयुष्यात हास्याची ऊर्जा पेरणाऱ्या या गुणी अभिनेत्रीला बातमीवाला परिवारातर्फे मनःपूर्वक शुभेच्छा.
#ShreyaBugde
#MarathiEntertainment
#MarathiTelevision
#MarathiActress
#Batamiwala | Posted on 02/Feb/2026 08:45:42
