Rana El Hariri

Rana El Hariri Instagram – مرحباً، بما أنو عدد يلي عم يتابعوني اتخطى المليون على الانستاغرام وعلى الفيس بوك، ولأنو أغلبكم بيعرفني من خلال جانب واحد بس من حياتي، اليوم بدي احكيلكم شوي أكتر عني 😊
اذا بدي عرفكم عن حالي بقول إني أم ل طفل هو أغلى ما عندي، وابنة رجل عظيم وامرأة استثنائية، ربوني على مبادئ وقيم عم حاول هلق ازرعهم ب ابني. علموني أن الطيبة أهم من الجمال، والبساطة أجمل من التصنع، وأنه أخلاقنا هي أغلى ما نملك والأخلاق هي حالة لا تتجزأ، يعني مو ممكن الانسان يكون خلوق بس بيكذب، أو بيغش أو بيسرق أو بيغتاب.
بابا كان حاصل على دكتوراه بالقانون الدولي وماما معها ماجستير رياضيات، وعندي أخ وأخت أصغر مني، أهلي ما كانوا أغنياء، كانوا موظفين وكنا نعيش على الراتب وكان النا صفحة بدفتر الديون عند جارنا البقّال 😅.
اتوفى بابا قبل ما كمل ١٨ سنة واضطريت وقف دراستي ب كلية الاقتصاد لواجه حياة جديدة ما كنت بعرف شي عن قسوتها وصعوباتها.
حياتي ما كانت سهلة، أنا بعرف الوجع، بعرف الفقدان، الخوف، الحاجة وبعرف كيف أحياناً تصرف بسيط إيجابي أو سلبي ممكن يأثر بانسان تاني ويضل بذاكرته مدى الحياة، لهيك دائماً بتمنى منكم تكونوا ألطف مع كل الناس😊.
أنا عشت بظروف مختلفة، الشي الوحيد يلي ضل ثابت عندي هو المبادئ يلي اتربيت عليها و تفاؤل ما فارقني حتى وأنا بأصعب الأوقات وقناعة راسخة جواتي بأنه الحياة متقلبة ومتغيرة بس دائماً القادم أفضل ان شاء الله. | Posted on 16/Mar/2023 21:31:38