Leila Tong Instagram – 7k呀！我跑咗7k呀！😭😭
睇返紀錄，我係喺7月24日，因為第一次跑到超過1k而決定開始跑步。今日係8月22日，我跑到我人生第一個7K。
以前一直理解唔到跑步改變人生到底會係點樣嘅一回事？（因為從來都覺得自己跑唔到步）而家我終於開始有少少感受到🥲
其實每次跑步嘅時候，都會聽到好多外在同內在嘅聲音，同時亦會有好多好複雜嘅感受，而就係呢啲聲音同感受，一次又一次陪伴我完成我覺得冇可能跑到嘅距離。
細個嘅時候，覺得跑步就係要用盡全力向前跑。從來都冇諗過慢慢跑，都係跑！每一步都計！最開頭跑街，唔敢忙得太遠，覺得好大壓力，望到所有嘢都好遠，覺得自己跑得好慢。但其實點解要快呢？我跑步係為咩呢？我同朋友講，其實我而家嘅目標只係要自己持續地做到「持續地向前移動」，咁我急咩呢？又唔係有隻暴龍喺後邊追住我！亦唔係諗住參加奧運！
今日，我終於嘗試望到好遠。當我咁樣做嘅時候，其實我發現，啲嘢其實係越嚟越近，而且會見到好多風景、散步嘅、踩單車嘅、放狗嘅、仲有同我一樣跑緊步嘅人，大家如果眼神接觸到，會點頭笑一笑。喂！其實咁樣跑步好正喎！點解我之前淨係望住個地呢？🤣🤣
今日有啲長氣，講咗好耐😅
不過真心覺得跑步真係一件好事，好到超出你嘅想像。
下次再講！😜
🏃🏻♂️🏃🏻♂️🏃🏻♂️
#持續地向前移動 | Posted on 22/Aug/2024 13:16:47
