Rana El Hariri

Rana El Hariri Instagram – بعد المنشور السابق كتير سألوني شو هو الهدف الأساسي من وجودنا بهالحياة.
طبعاً كل انسان بالعالم ممكن يحط لوجوده أهداف خاصة فيه، لبعضكم العبادة هدف، والبعض الآخر بيعتبر نفسه موجود بهدف رعاية عائلته، وكتيرين بيظنوا أنه هدف الوجود هو الوصول للسعادة عن طريق جمع المال مثلاً.
بالنسبة الي الهدف من وجودنا في الحياة هو ببساطة لحتى نعيش.
لحتى نختبر نعمة الوجود على هي الأرض بكل تفاصيلها، الحلوة والمرّة، بدون ما نؤذي غيرنا.
نعيش من خلال مشاعرنا، لما نحب بصدق، ونحس بالألم، لما نعاني من الفراق، نقاوم الاكتئاب وتكسرنا الخيانة أو الغدر، بس دائماً نرجع ونرمم حالنا.
لما نمر بتجارب مختلفة، نغلط ونتعلم من أخطاءنا، لما ننجح بأنه نتجاوز الصعوبات ونتخطى اليأس بدون ما نسمح لظروفنا الصعبة أنها تدمر أي شي جميل جواتنا.
ونستمتع بانجازاتنا ولو كانت بسيطة ونلاقي دائماً أسباب ومبررات للتفاؤل والفرح حتى لو اضطرينا نخترع هالأسباب من العدم.
نحنا منعيش لما نتفاعل مع الآخرين، لما نتعرف على ثقافات مختلفة، ونتعلم كيف نحترم كل المعتقدات، ونتقبل كل الآراء حتى يلي ما بتعجبنا، ونبني صداقات وعلاقات فيها حب ومودة تدوم معنا لآخر الحياة.
لما نتعاطف مع غيرنا ونسند بعض كبشر، بغض النظر عن جنسياتنا، معتقداتنا، ألوان بشرتنا وانتماءاتنا، لأنه مساعدة الآخرين هي أسهل طريقة لنعطي فيها لوجودنا ولحياتنا معنى. أنتو شو برأيكم هدف وجودنا بهالحياة؟ | Posted on 12/Apr/2023 20:23:57