Rana El Hariri

Rana El Hariri Instagram – علمتني الحياة أنو بهالدنيا ما في شي مضمون.
أجمل البلدان ممكن تدمرها الحروب، أقرب الناس ممكن ياخذهم الموت، أفضل الأصدقاء ممكن تبعدهم الظروف، صحتنا ممكن تخذلنا، المصاري دائماً بتفقد قيمتها، أغلى الممتلكات ممكن تُسرق وتُنهب.
لهيك عندي شعور دائم بالامتنان، ممتنة لكل الناس الموجودين بحياتي، ممتنة لكل تفصيل، لكل لحظة بعيشها و كل تجربة بمر فيها.
علمتني الحياة أنه السعادة الدائمة هي مجرد حلم، والانسان السعيد هو يلي بيعرف يسرق من السعادة لحظات كل فترة، والحزن شعور جميل لأنه بيخلينا نشوف العالم من منظور مختلف، وبيعطي للحظات السعادة معنى وقيمة أكبر، أما الألم فهو الشعور يلي بيصقل أرواحنا، اذا كنا من الأساس أشخاص جيدين شعورنا بالألم بيخلينا نصير أفضل، منقدر نتعاطف مع غيرنا ونفهم أنو بحياة الآخرين ممكن نكون السم و ممكن نكون البلسم.
علمتني الحياة أنه البشر مختلفين، في منون الكذابين، والمنافقين، الاستغلاليين، ويلي بلا ضمير وبلا أخلاق، بس في كمان بهالحياة أشخاص رائعين، طيبين، محبين، صادقين، مخلصين، يمكن عددهم بهالزمن صار قليل، بس أكيد لسا موجودين، وأسعدنا حظاً هو يلي بيصدفهم وبيتمسك فيهم، وما بيسمح لحاله لأي سبب يخسرهم، لأنو متل هيك ناس ممكن ما يجوا بحياتنا أكتر من مرة ❤️ | Posted on 24/Mar/2023 22:47:18