Rana El Hariri

Rana El Hariri Instagram – يلي بيعرفوني منيح بيعرفوا أنه أكتر كلمة بستخدمها في الحياة و بكررها دائماً هي ‘شكرا.
أنا ذكرت الموضوع سابقاً بس كمان مرة بدي ارجع اكتب بوست خصوصي لقول شكراً لإنسان بحبه كتير وهو صاحب فضل علي.
كتار منكم بعتولي وسألوني كيف بلشت كتابة سيناريو خاصة أنه دراستي كانت ضمن مجال مختلف وهلق رح جاوبكم.
أنا بدأت الكتابة بتشجيع من هذا الانسان الرائع، يلي شاف فيني موهبة أنا ما كنت متأكدة من وجودها.
القدر الجميل ساقني لأتعرف عليه بالصدفة، كنت صغيرة بالعمر حوالي ٢١ سنة، اتجرأت وحكيتله عن فكرة كانت عندي، حكيت معه و أنا خجلانة، خايفة من ردة فعله، اتوقعت يصدني، أو بأفضل الاحوال يجاملني برد لطيف و يتجاهلني، بس يلي عمله كان مختلف تماماً عن كل توقعاتي، برغم بساطة فكرتي ويمكن سذاجة طرحي اهتم بكلامي جداً، شجعني، وقلي الأنثى بتشوف العالم بطريقة مختلفة عن الرجل، الأنثى عاطفية أكتر وبتشوف الحياة من خلال مشاعرها، وقلي اكتبي لأنه الدراما بحاجة دائماً للأقلام النسائية، اكتبي وخليني اقرأ وبعدين منحكي.
كتبت تحت اشرافه، علّمني، و وجهني، وساعدني و عطاني أول فرصي لما سمحلي أكتب لوحات صغيرة لبرنامج كان يقوم بإخراجه اسمه CBM كان يعرض على قناة ال MBC ومن بعدها طلب مني شارك بكتابة لوحات لمسلسل بقعة ضوء يلي كمان كان بوقتها عم يخرجه.
الأستاذ هشام شربتجي هو اسم كبير، علم من أعلام الدراما السورية، الله يحميه ويطول بعمره، وحتماً انسان متله مو بحاجة شهادة مني، بس أنا يلي بحاجة إني اذكر قديه أنا ممتنة وقديه أنا فخورة بمعرفته وإني بعمري ما بنسى أنه بمرحلة من حياتي لما كنت بحاجة لمساعدة وقف جنبي وساعدني. | Posted on 20/Mar/2023 23:34:22